ديسمبر
23
في 23-12-2008
تحت تصنيف (عام) بواسطة السعدي

السلام عليكم ورحمة الله وبركاته

قد يكون العنوان غريب شوي ،، ولكن إذا عرفتوا القصد وسمعتو المقطع

بتقولون صح هذا هو الازعاج المريح  !!!!

اخواني نفس ما قلت لكم قبل اني أعمل في مركز لتحفيظ القرآن

قبل كم يوم غاب عندنا مدرس ،، المشلكة أن هذا المدرس يدرس الأطفال ،، يعني أغلبهم في الصف الأول الابتدائي

فسقط الفأس في رأسي لأني ( الجوكر ) لازم اقعد عند الأولاد ما يصير بيقون من غير مدرس ،،،

المشلكة أن فيهم كم واحد مشاغبين بشكل كبير ،، حركيّين وما يسكتون

(( كل شوي واحد يقول بشرب ماي ، والثاني بسير الحمام ، والثالث : استاد شوف فلان ما يقرا معانا ،، والرابع : استاد فلان ما ياب الكراسة معاه ,,,, إلخ ))

يعني كل واحد متكلف بالثاني وما يسكت

(( ذكروني بنفسي أيام الدراسة والجامعة ))

اتبعت معهم جميع الأساليب ،، الترغيب والترهيب وغيرها من الأساليب ،، بس ابغيهم يسكتون ويتابعون القراءه

المهم سكتهم وقلت لهم اقروا سورة الفاتحة قراءة جماعية (( عشان اتخلص من شرهم )) وبعد الفاتحه بدأنا بسورة الناس واحنا طالعين ،،

لكن طبيعة الإطفال ما لها تفسير ،،، اللي يشوفهم كأنهم قاعدين على جمر كل شوي واحد يتحرك أو يتكلم أو يصيح أو ،، او ،، او,, إلخ

انزعجت منهم وايد ما يسكتون وما أبغي أشد عليهم لأنهم أطفال ،، ومن جهة ثانية ما ابغي ابدأ معاهم في حفظهم المقرر عليهم ،، لأني ما أبغي أخرب النظام اللي يمشيهم عليه المدرس ،، فكانت القراءة الجماعية والمراجعة أحسن حل .

كانت عندي مشكلة مع واحد من الأولاد اسمه عبدالله (( كثير الحركة )) ،،، قلت حق عبدالله : انت صديقي تعال اقعد عندي واسكت ،، قام من مكانه وقعد بجنبي وكنت كل شوي اسكته واذا ما نفع معاه الكلام ،، اسطعه سطعة خفيفه تنبيهيه .

ومن الصوب الثاني (( سلطان )) وما أدراك ما سلطان ،، هذا روحه يخبل بلد ،، كل المركز يعرفه ،، هذا اظن اذا سكت ذاك اليوم عيد ،،،

كنت اخاف أني اوصل لدرجة من الغضب فأشد ع الأطفال ، وأعصب عليهم

فقلت لازم استغل الموقف بشكل إيجابي وأخليه يكون من صالحي ،، وأستفيد منه ،، يعني محاولة اقناع النفس بفايدة الموقف والنظر للإيجابيات اللي فيه ,,, بدل العصبية

طلعت التلفون من جيبي ،،، وقلت للأطفال اقروا سورة الفاتحة ،،، وقمت اسجلهم عشان اسمعكم اصوات أطفال مركزنا ^_^

(( عرفتوا الحين شو هو الازعاج المريح ،،، الازعاج المريح انك تمسع أصوات هالاطفال ،، وتسمع هالحناجر الصغيره تصدح بآيات القرآن ،، هاذي الحناجر التي لم تبلغ الحلم ولم تُكلف بعد ،،، ولم تتلوث بآفات الدنيا ))

بس المشكلة في قراءتهم أن الاطفال ما يستمرون على وتيره وحده في القراءة الجماعية ،، لأن هذا الشي أصلا صعب

(( يعني كفو عليهم أنهم في البداية كانو منتظمين مع بعض ،، لو انهم خربوا كل شي فالنهاية ،،، وصار كل واحد يقرا بروحه ))

وفي النهاية وبعد مفاوضات سلمية طويلة مع الأطفال سيطرت وقدرت اسكتهم كلهم وأعيش باقي الوقت في سعادة وهناء ^_^

اتبعت معاهم اسلوب (( حاميها حراميها )) طلب من روؤس الشر والشغب أنهم يراقبون الطلاب ويخبروني منو اللي تيكلم ومنو الي يتحرك ..

بديت بسلطان بطبيعة الحال ،، لأنه رأس الحيه ،، قلت له : سلطان اسمعني ،، أبغيك تشوف لي منو يتكلم ومنو يتحرك ،، بس لازم أنت تبقى ساكت ،، (( سلطان فرح وصدق عمره ،،، أوكلنا له مهم رسمية ))

سكت وتم يراقب الطلاب يجلب عيونه يمين يسار ،، فصار مزعجنا هو مراقبنا ..

طبعا الكل يغار ،، عبدالله قال لي : استاد بعد انا ،،

قلت له : زين يا عبدالله انت بعد معاه بس  نفس الشي لازم روحك تسكت ،،

واذا ما سكت ما بخليك تراقب الأولاد

بعد عبدالله ،،، أغلب الأولاد قالو نبغي ،،، وعشان اخلص منهم ومن حشرتهم ،،

كل واحد قال : ابغي ،،، قلت له : : أنت معاهم .

في واحد كشفني ،، ضحك ضحكه

وقال استاد : كلهم يراقبون ،، زين يراقبون منو … (( قلت في نفسي هذا كشف الخدعة ))

وعشان ما يزعجوني باقي الوقت وكل شوي واحد يقول فلان تكلم ،،، قلت لهم ،، انتو الحين راقبو ،، واذا طلعنا خبروني بأسماء المشاغبين ما ابغي الحين تزعجوني ..

الكل وافق ،،،، وصار كل مشاغب يطالع المشاغب الثاني

وخلص علينا الوقت واحنا مرتاحين ،،،

والسموحه منكم ع الاطالة

اخوكم السعدي



التعليقات

ريم بتاريخ 23 ديسمبر, 2008 الساعة 10:46 م #

الصراحة تصرفات الهيال حلوة…

لكن ما تروم تقص عليهم وعندهم ذكاءاتحمل لا يسوون فيك مقلب..

ربي يحفظهم

ويعطيكم الف عافية

جعله في ميزان حسناتكم…


السعدي بتاريخ 25 ديسمبر, 2008 الساعة 1:02 م #

ريم

مشكورة ع المرور وبالفعل مثل هاليهال

لازم الواحد يحذر منهم

تراهم يخوفون

السعدي


mr.mtwa3 بتاريخ 26 ديسمبر, 2008 الساعة 8:30 م #

والله يا خوي كتبت رد طويل …. عقب مسحته …. تعرف ليش …. لأني في النهاية احتقرت عمري … و غبطتك على هالنعمة … الجميلة .. إللي كانت في فترة من عمري … أكبر أحلامي …. :( :( :(

آه يا زمن الفتنة … والله اختربنا … و غيرنا يربي أجيال …. :(

و الله يا خوي … اسجد لله شكراً عهالنعمة .. :)

ومبروك عالترقية


Precious بتاريخ 27 ديسمبر, 2008 الساعة 3:03 م #

السلام عليكم والرحمة..

الله المستعان .. ما شاء الله عليهم .. بس حشرتهم حلوة ..

سمعت اختي الصغيرة صوتهم تقولي بس الأولاد يسوون جيه بالروضة << تقصد ان هي هادية

والسلام عليكم


Precious بتاريخ 27 ديسمبر, 2008 الساعة 3:03 م #

السلام عليكم والرحمة..

الله المستعان .. ما شاء الله عليهم .. بس حشرتهم حلوة ..

والسلام عليكم


أم كايد بتاريخ 30 ديسمبر, 2008 الساعة 4:12 ص #

يعطيك العافيه


لولوة بتاريخ 31 ديسمبر, 2008 الساعة 4:07 م #

فعلا حناجر صغيره قد صدحت بآيات الله..

ما اجملها من أصوات..

الله يحفظهم ويثبتهم..

بارك الله فيك اخي السعدي..

وانه لشئ رائع ان تكون معلم..

وليس اي معلم..

تقبل احترامي لك.

اختك

لولوة


بنت الإمارات بتاريخ 8 يناير, 2009 الساعة 4:27 م #

يعطيك العافية اخوي
والله يصبرك على هاليهال
يبون سياسية وصبر
ننتظر جديدك


أضف تعليقك
اسمك :*
بريدك :*
موقعك :
تعليقـــك: