نوفمبر
03
في 03-11-2008
تحت تصنيف (قصص الشعوب) بواسطة السعدي

السلام عليكم ورحمة الله وبركاته

في البداية شكرا لكل من تفاعل معنا في هذه المدونة

واليوم يبت لكم قصة جديدة وحلوه ومفيده ، وبتعجب الحريم وايد وايد ، لأنها تتكلم عن النساء وتمدحمهم

يعني في النهاية بحصل لي حزب مؤيد لأني بمدح الحريم هالمرة

** في أمر ضروري لابد نتنبه له ، في اغلب القصص اللي بتمر علينا ، بتلاحظون مصطلاحات دوم تتكرر ، مثل ( الشيخ ، الأمير ، الحاكم ، القاضي وغيرها من المصطلحات )

هذه المصطلحات ما نقصد بها اي شي ، هي عبارة عن شخصيات خيالية ،

ولكن نذكرها لأنها موجوده في القصص وأحداث القصة تدور حولها

نبدأ بالقصة

يروى أن هناك صاحب دكان ، محطي لوحة على الدكان وكاتب عليها

” الحيلة حيلة الرجال ، والمكر مكر الرجال ” == بس شكله صاحبنا غشيم لو ما كان كاتب هالكلام أحسن له ==

مرت على الدكان حرمة وكانت ذكية ، غاظها الكلام الموجود

قالت في نفسها : انا بأدب هذا وبخليه يعرف أن الحيلة حيلة النساء وأن المكر مكر النساء

دخلت عنده الدكان وسلمت عليه ،

وقالت له : أنت متزوج ؟؟

قال : لا مب متزوج .

قالت : شو رايك تتزوج بنت القاضي !!!

قال : أنا مسكين ويني وين بنت القاضي ، ما بيزوجني بنته .

قالت : ما عليك اذا تبغيها انا برتب لك الأمر . لأني انا بنت القاضي .

قال : زين بس اذا القاضي بيوافق أنا ما عندي مشكلة .

قالت : اسمع أنت اليوم سير مر على القاضي في المجلس ، بتحصله قاعد والناس عنده .

ادخل عنده وقوله له : ابغي اتزوج بنتك !!

قالت له : اسمع ترى القاضي لأنه ما يبغي يعطيك بيردك ،

وبيقول لك : بنتي عميه ما تشوف ، صمخه ما تسمع ، بلمه ما تتكلم ، مب حلوه ، كل العيوب فيها .

انت ما عليك من القاضي ، قول : موافق ابغيها .

بيطلع لك هالأعذار عشان انت من نفسك تقول ما أبغي .

ولكن نفس ما أنت تشوف ، انا بنت القاضي ولا فيني أي شيء ولا فيني أي عيب

صاحبنا الغشيم راعي الدكان صدق البنت .

قفل الدكان فالليل وسار مجلس القاضي

وقعد عنده وطلب منه ان يزوجه بنته

القاضي رد الولد

وقال له : بنتي عمية صمخه بلمه مريضة وفيها وفيها

الولد ما صدق هالكلام من القاضي

لأن البنت من قبل خبرته أن القاضي بيعتذر بهالعذر

وهو شاف البنت ما فيها اي عيب

قال : ما عليه موافق

القاضي حاول يقنع الولد لكن الولد رفض وأصر أنه بتزوج بنت القاضي

القاضي يوم شاف اصرار الولد

قال : ما عليه وافقت زوجتك البنت ، ولكن متى بتدخل عليها ؟

الولد فرح وقال : من باجر ؟؟

اليوم الثاني جهزوا البنت للولد ودخل عليها

أول ما دخل عليها وشاف شكلها .

انصدم قال في نفسه

داخل على بنت أو على صنم

لا روح ولا شي ، لا سؤال ولا جواب

الولد كشف الخدعة وقعد طول الليل حزين يفكر ع اللي صار له

وليش هالبنت خدعته وقصت عليه وطاحته في هالورطه

اليوم الثاني من الصبح سار فتح الدكان وقعد حزين مويّم الدنيا طايحه عليه

يفكر في الورطه اللي طاح فيها وكيف يخلص منها

وهو قاعد في همومه واحزانه مرت عليه نفس البنت اللي خدعته وقصت عليه

قالت له : ليش حزين ؟ البارحه دخلت على بنت القاضي .

قال : انت ليش خدعتيني ؟ ليش قصيتي عليّ ؟ أنا شو سويت عشان توهقيني مثل هالوهقة ؟

قالت : أنت شو كاتب ع اللوحة ؟

قال : ما كاتب شيء ؟

قالت : لا ،، كاتب الحيلة حيلة الرجال والمكر الرجال ،،، وإذا عندك حليه اطلع من هالورطه بحيلتك .

وأما اذا تبغيني اطلعك من الورطه ، غيرها واكتب ” المكر مكر النساء والحيلة حيلة النساء “

قال : طلعيني من الورطه ومستعد اكتبها بماي الذهب .

قالت : اسمع ،، سير برع البلد وبتحصل هالزمارين والرقاصين والطبالين

“”"” هذا الصنف من الناس في مصطلح القصص عندنا يكون مشهور بإنهم من حثالة المجتمع ، وما في أحد يحب أنه تقرب منهم “”

قالت : سير لهم وعطهم شوية فلوس ،، وقول لهم : تعالو اليوم مجلس القاضي وانا بكون قاعد جنب القاضي

ادخلو المجلس وباركوا لي بالزواج ،،

واذا سألك القاضي : منو هالناس ؟؟

عرفهم للقاضي أنهم اهلك أبوك وعمك واخوانك ،، وأنهم يو يباركون لك بالعرس ويباركون للقاضي

الولد نفذ الخطة وسار وكلم هالزمارين عشان يباركون له وعطاهم المقسوم

وبعدين يوم كان قاعد عند القاضي في المجلس والناس قاعدين

دخلو الجماعة وسلموا على القاضي وسلمو على الولد وباركوا لهم بالعرس

استغرب القاضي من الناس اللي دخلوا عنده يباركون له بزواج بتنته

سأل الولد وقال له : تعرف منو هاذيل اللي يباركون لنا بعرس البنت ؟؟

قال الولد : هيه نعم .

هذا أول واحد دخل عليك تراه الوالد ،، والثاني اللي عنده سبال عمي ،، وراعي الطبل هذا اخوي ، وراعي المزمار ولد عمي وذاك اخوي الثاني .

المهم الولد عدد الموجودين للقاضي وطلعهم كلهم من اهله اخوان واعمام وعيال عم وعيال خال .

القاضي يوم شاف هالاشكال ، عصب

وقال للولد : ما دام أنت من هالناس انا ما ابغي بنتي تبقى عندك ،،، طلقها .

الولد ما صدق عمره وفرح ، وطلق البنت .

اليوم الثاني رجعت البنت لصاحب الدكان

قالت : سمعنا انك طلقت بنت القاضي ؟

قال : هيه طلقتها وافتكيت منها .

قالت : زين وين الوعد اللي وعدتني به ،، انك تشل اللي كتبته وتكتب بداله ” الحيله حيلة النساء والمكر مكر النساء “

قال : الحين بطلب الخطاط عشان يكتب هالكلام بماي الذهب .

وطلب الخطاط وبالفعل كتب بماي الذهب .

“” الحيلة حيلة النساء والمكر مكر النساء “”

وانتهت قصتنا

وسلامتكم

واتمنى أن تكونون استفدتوا منها

اقول :: الله يرحم من هالحريم ما يفكن الواحد

يعني هالمسكين بغا يطلع طلعه في زمانه بهدلته لعوزته

ولكن الله سبحانه وصف كيد النساء انه عظيم

وقال عن كيد الشيطان ( إن كيد الشيطان كان ضعيفا )

دام كيف الشيطان ضعيف وكيدهن عظيم

عيل الله يرحم منهن

والسموحه مكنم اخواني

ولا حد ياخذ في خاطره على التعليق الأخير اللي في نهاية القصة لأني أمزح

اخوكم السعدي



التعليقات

محمد بتاريخ 4 نوفمبر, 2008 الساعة 10:12 م #

قصة جميلة يا اخوي السعدي

تسلم وصدقت

بالفعل الحريم الله يستر منهن

يودن الواحد في مصايب


ريم بتاريخ 8 نوفمبر, 2008 الساعة 9:08 م #

الحريم عندهم ذكاء يشغلونه وقت يبون….

ولو اشتغل هذا الذكاء والدهاء الله يستر…

يعطيك العافية اخوي على القصة بس التعليق الآخير ؟؟؟؟؟

واااااااايد فحقنا…


lil.D بتاريخ 24 نوفمبر, 2008 الساعة 6:15 م #

حبيت القصه :) .. وايد حلوة
هههه (إن كيدهن عظيم)
لو منه ما بتحدى الحريم مره ثانيه ^_^

شكرا على القصه


السعدي بتاريخ 24 نوفمبر, 2008 الساعة 6:21 م #

تسلمون ع المرور الطيب اخواني

نورتو الصفحة بوجودكم

وأعدكم بصقة يديدة اليوم

اخوكم السعدي


روح العين بتاريخ 25 نوفمبر, 2008 الساعة 5:07 م #

يعطيك العافية أخويه
قصة جميلة
وتعلمنا دروس إنا ماانصدق أي أحد
وأما الحيلة والدهاء فهي في المرأة والرجل
والمرأة في القصة أرادت إثبات أن النساء
لديهن من العقل والذكاء مايجعلهن
منافسات للرجال في مجالات العلم
وغيرها
والحمدلله إن كيدنا عظيم …ههههه
مادام الرجل قوته بجسمه
أصبح للمرأة قوة سحرية تحميها
و من سيطرة الرجل وسلطانه
*
*
اختك روح العين


السعدي بتاريخ 26 نوفمبر, 2008 الساعة 2:40 م #

شكرا ع المرور روح العين

مرور جميل وتعليق اجمل

اختي صح الحريم عندهم حليه

ولكن ان هذا غشيم

مشكلته انه غشيم وبغا يستوي ذكي

وطاح في حظه هالحرمه

يعني وهق عمره

المفروض انه يعقل ويحترم نفسه ويحترم غيره

السعدي


أم كايد بتاريخ 26 ديسمبر, 2008 الساعة 5:42 م #

يعطيك العافيه
وتسلم إيدك عساها باليمين تاخذ صحايفها


أضف تعليقك
اسمك :*
بريدك :*
موقعك :
تعليقـــك: