ديسمبر
14
في 14-12-2008
تحت تصنيف (عام) بواسطة السعدي

السلام عليكم ورحمة الله وبركاته

أحيانا تمر على الإنسان مواقف عجيبة غريبة في حياته

وأحيانا يعيش الإنسان في بيئة مليئة بالعجايب والغرايب

ومن أعجب الأماكن اللي شفتها مسجدنا مجسد الحي اللي نصلي فيه

يعني تحصل الناس اشكال أنواع كل واحد يسوي شي

وكل واحد يسوي الشي اللي يبغيه

(( شو نسوي إمامنا ديمقراطي معطنهم كامل الحرية ))

يعني تبدأ الصلاة ويكون عدد من المكيفات شغال

ما تخلص الصلاة إلا والمكيفات كلها مطفيه

وبعد الصلاة على طول تحصل اي حد من الجماعة سار يشغل المكيفات

واحيانا نفس المكيف يشتغل ويبند اكثر من مرة خلال دقايق

واحد يقول برد والثاني يقول حر

بس الله يرحمنا من هالمشاكل اللي في مسجدنا

ومن أغرب الغرائب

عندنا شايب في المسجد يبغي يتحكم في المسجد على كيفه

ويبغي يحكم المسجد ويحكم الإمام

ولكن الإمام ما يسايره على كل شي يطلبه

حتى انه بدا يكره الإمام وفي الأخير

قام هذا الشايب وسب الإمام في المسجد جدام الناس كلهم

وكان في رمضان وقت صلاة المغرب

وقال حق الإمام (( يهودي )) وقال له كلام طويل

والمشكلة انه لين الحين يصلي معنا في المسجد

مع العلم انه يقول حق الإمام يهودي ،،،،

(( مدري كيف هذا يرضى يصلي ورى يهودي ))

أصلا هذا الشخص حالة استثنائية خاصة

وله مواقف كثيرة مع الناس والأئمة في المسجد

ما مر إمام ع المسيد إلا حصل له مواقف مع هالشايب

*****************************

ومن المواقف الغريبه والطريفة في مسجدنا

وهذا الموقف حصل لي شخصيا

كان يوم عرفة اليوم التاسع من ذي الحجة

مسكني احد جماعة المسجد وقال لي

عندي استفسار بسيط اذا ممكن ؟؟؟!!!

قلت له :: تفضل .

قال : متى العيد ؟ هل هو باجر أو متى ؟؟!!!

عاد خبلني ما عرفت شو اسوي كيف ارد عليه ابتسمت وقلت له نعم ..

يعني اول مرة اشوف جي شي

في يوم عرفة تحصل حد يسأل متى العيد ؟؟

**** ومن المواقف الغريبة والعجبية ****

مرة كنا نصلي وفي أولاد صغار مسوين حشره وازعاج في المسيد

بعد الصلاة إلتفت صوبهم ريال شايب وعصب عليهم

وتكلم عليهم وبعدين قال لهم

ما تييون صلاة العشا إلا مع ولي أمركم .

(( ذكرني بأيام الدراسة ،، استدعاء ولي امر الطالب ))

بس ما اردي منو بيحاسب ولي امر المصلي المشاغب

هل الإمام ؟؟ ام الشايب ؟؟

**** ومن المواقف اللي دايم تصير في مسيدنا

أول امس صلى في المسيد واحد من اصحاب الجنسية الآسيوية

وكان معه اطفال صغار ومسوين ازاعاج طول وقت الصلاة

عقب ما خلصنا الصلاة

إلتفت واحد من الشياب على اليهال ومعهم والدهم

وقال له : ليش يبت معك هالصغار المسيد

مسوين حشرة محد يقدر يصلي

مرة ثانية بنضربهم

واذا ما نفع بنضربك معاهم

(( شيابنا شديدين ما عندهم واحد اثنين يقضون على الشر من جذوره ))

********************

أحسن موقف كان مع الحمامه اللي دخلت المسيد

بعد ما صلينا الظهر اشوف حمامة في المسيد

تطير من على هالمكيف وتحل ع المكيف الثاني

المهم

بعد الصلاة وبعد ما طلعوا الناس من المسيد

قام الإمام بيطلع الحمامة برع المسيد

وقام معه مجموعة من جماعة المسيد

وفتحو كل الدرايش (( النوافذ )) عشان تطلع الحمامة وفتحو الابواب

ولكن المشكلة ان الحمامة غبية

ما تشوف تحت ما تشوف الدرايش

بس تنتقل من مكيف للثاني

وبعد ما تعبتنا ولعوزتنا

والحمامة روحها تعتب قامت ما تقدر تطير

لانها سوت المسيد حلبة وميدان

اظن لفت على كبرة المسيد خمسين او ستين لفه

وفي النهاية طاحت

ولحسن حظها انها طاحت في الدريشه وطلعت

وافتكينا منها

**********

وتسلمون ومشكورين على متابعتكم

واذا حصل شي في مسيدنا

مسيد الغرائب والعجائب

بخبركم إن شاء الله

اخوكم السعدي



التعليقات

أسامة بتاريخ 15 ديسمبر, 2008 الساعة 12:11 ص #

صدق انه مسجد عجايب وغرايب!
هالنوعية من الشواب فعلا مشكلة!


السعدي بتاريخ 16 ديسمبر, 2008 الساعة 10:48 ص #

أخي اسامة

شكر لك على مرورك

هذا الشايب اللي عندنا مب مشكلة وبس

مصيبة من مصائب الزمان

السعدي


ريم بتاريخ 18 ديسمبر, 2008 الساعة 10:24 ص #

أحلى ما في المسجد قصة الحمامة
يمكن هي مستانسة بالمسيد ما تبى تظهر

حتى أمكان العبادة أصبح فيه الغرائب والعجائب ألا تكفي عجائب الدنيا ومشاكلها…

لكن أنا أستغرب في أناس يدخلون مكان العبادة ويجعلوه مكان للافتعال المشاكل والازعاج..

يعطيك العافية اخوي على مختصر مواقف مسيد الحي
مسيد الغرايب …

ونتريا مواقف أيضاً من مسيدكم ..


محمد بتاريخ 18 ديسمبر, 2008 الساعة 1:03 م #

صدق مسيدكم هذا عجايب غرايب

والله يعينكم ع الشواب

تراهم مشاكل في كل المسايد


lil.D بتاريخ 18 ديسمبر, 2008 الساعة 3:13 م #

نحن المسيد اللي عندنا على حسب ما اسمع نفس الشي
حتى مسيد فمنطقه ثانية، الشواب مايعيبهم شي
او تقدر تقول يبون الامام يراعيهم بكل شي :) حتى وقت اقامة الصلاة!

عن الحمامة، بخبرك سالفة مشابهه
في بيتنا باب اسود، ومره دخل تيس (من بيت الجيران)
وفر فالبيت كله والهنود يربعون وراه يبون يزخونه
التيس من زود الحماس والسرعه سار صوب الباب
شفت هاللقطه بعيني وللحين منصدمه >_<
الباب مسكر والتيس دخل بكل قوته ع الباب
طاح ع الارض مدوخ وزخوه الهنود لووول


الثعلب بتاريخ 1 يناير, 2009 الساعة 2:25 م #

هذي النوعية من الشيبان موجودة في كل مكان
الشايب أي وضع غير طبيعي في المسجد يخليه يعصب سواء في تأخر الأقامة أو اذ رن الموبايل


أم كايد بتاريخ 10 يناير, 2009 الساعة 3:59 ص #

الله المستعان يعطيك العافيه ياخوي
وخلك بعيد عن الشياب


أضف تعليقك
اسمك :*
بريدك :*
موقعك :
تعليقـــك: